నాన్నంటే

శుభోదయం🌹🌹🌹🌹🌹

గజల్. విజయ గోలి

గజల్. విజయ గోలి

ముళ్ళబాట కష్టమేదొ తెలుసుకునే నడిచేసా
పూల దెబ్బ గట్టిదనీ తెలియకనే అడుగేసా

గుర్తులలో గుల్మొహరులు విచ్చుకున్న వివశంలో
చేరువవని తీరాలను చెమ్మలలో వదిలేసా

కనులు కూడ రాయగలవు కన్నీటితొ కావ్యాలను
వెతలు నింపు అక్షరాల అధరాలను అదిమేసా

దూరమెంత జరిగిందో …కాలమెంత కరిగిందో…
చెలిమేదో చేయి జాచ…చెమరింపులు చెరిపేసా

శత్రువైన తలుపు తడితె హత్తుకునే మనసేగా
మదినిండిన మకిలంతా “విజయంగా కడిగేసా!

ఆత్మీయ స్నేహితులైన నాన్న లందరికీ….
అంతర్జాతీయ పితృదినోత్సవ శుభాకాంక్షలు 💐💐💐💐💐

నాన్నంటే …నాలుగు రాటలు తానై నిలిచిన నీడేగా
కొండపైన కోవెల దేవుడు అండగ నిలిపిన తోడేగా

తరువులోని త్యాగం సతతము చూపే తాపసి తానేగా
తప్పటడుగు తరుణం తానొక రక్షణ శిక్షణ గురువేగా

కనుపాపలు తనవే కాని ఆ కలల రాజ్యము పిల్లలదే
ఇంద్రధనువు ఊయల నెక్కగ నిచ్చెన మోసిన మూపేగా

కలత దాచి కన్నుల …వెలుగుల వేడుక పంచిన వేదికగా
భుజంతట్టి బుద్ధిగ ఎదిగే మెలుకువ తెలిపిన చెలిమేగా

మీ నడతే …విజయపు కానుక నడకలు నేర్పిన నాన్నలకే
ఈ ఘనతే నీదన … గర్వం మెరిసిన ముసి ముసి నవ్వేగా