దారిమారి పోదు

20/8/2020
గజల్  విజయ గోలి

కనులుమూసి కలగంటే కాలమాగి పోదుకదా
గీసుకున్న గీతలతో రాతమారి పోదుకదా

పూవుతావి స్నేహంలో తుమ్మెదలె కమ్ముతుంటె
చేసుకున్న బాసలకే చేతమారి పోదుకదా

సహనంతొ సరిహద్దులు ఎంచకుంటె మేలుకదా
అడుగడుగున అన్యోన్యత జాడమారి పోదుకదా

రాచబాట హంగులెపుడు పొంగిపోవు రంగులేను
రాచరికం తెలుసుకుంటె దారిమారి పోదుకదా

సరదాలే సంకెళ్ళుగ సాగుతున్న విజయంలో
గుచ్చుకునే విరిముళ్ళతొ ప్రాణమాగి పోదుకదా