విశ్వమంత తరచి చూడ

గజల్ సాహిత్యవేదిక
గజల్ తరంగ్ గజళ్ల రచన పోటీ
రెండవ విభాగము , కొత్త కలాలు
విజయ గోలి. 9704078022

విశ్వమంత తరచిచూడ వింతలతో వేడుకలే
పొత్తులేని పోకడలలొ విలువలతో వేడుకలే

ఋతువులారు ప్రకృతి ఒకటె అనుభవాలు వేరువేరు
సారమేదొ తెలుసుకుంటె భవితలలో వేడుకలే

కలిమిలేమి కలకాలపు బంధువులే కాచుకుంటె
కనులనీరు దాచుకుంటె నటనలలో వేడుకలే

కాలమిచ్చు తీర్పులలో కలతమాసి పోవునులే
మరుపన్నది మాత్రలుగా మలుపులలో వేడుకలే

కమ్ముకున కరిమబ్బుకు తెలియదుగా ఉనికెక్కడొ
ఉప్పుతోటి ఉసిరుకున్న బంధాలలొ వేడుకలే

నిన్ననాది రేపునీది ఆశలతో పోరాటం
మరునిమిషం తెలియలేని మనుగడలో వేడుకలే

ఆకాశం కప్పుకున్న అవనిదెపుడు విజయమేగ
అంతిమంగ మనిషి బ్రతుకు మాయలలో వేడుకలే