వేణుగానం

aవేణుగానం విజయ గోలి

రేయిపగలు సంగమించిన
అందమేకద సందెపొద్దు
నింగిమెరిసే చుక్కదీపం
వెలుగులేగద చిన్నిఆశలు

మనసులోని తపనలేవొ
మోముపైన మెరుపులగును
నీలి కురుల అగరుపొగల
తెమ్మెరేగద తీపి ధ్యాసలు

కోయిలమ్మ కూతలేగ
వలపు స్వాగత గీతాలు
ఛైత్రమాసపు వన్నెలేగా
మనసు నింపిన చిత్రాలు

తెల్ల మబ్బుల తెరల దాగిన
వెండిజాబిలి దోబూచులేగ
చూపుకలిపి మదిని దోచే
మరుని విరి తూపులు

మనసుగెలిచిన మౌనం
మాటలాడితే గానం
మరల మరల కోరుకుంటే
వెల్లువయ్యే వేణుగానం